Shirye-shiryen wuraren ibada na kasar Iraki don tarbar masu ziyarar Arbaeen

Tehran (IQNA) Garuruwa daban-daban na kasar Iraki musamman wuraren ibada na Najaf da Karbala sun aiwatar da tsare-tsare daban-daban na tarbar maniyyata bisa la'akari da yadda miliyoyin masu ziyara za su halarci taron Arba'in Hosseini na bana.

Kamfanin dillancin labaran kur’ani na iqna ya habarta cewa, ya nakalto daga shafin sadarwa na yanar gizo na tashar Al-Ahed cewa, mafi akasarin shirye-shiryen tarbar masu ziyara Arbaeen na Imam Husaini na kasar Iraki sun fi mayar da hankali ne kan shirye-shiryen hidima da suka hada da samar da ruwa da abinci da ayyukan kiwon lafiya da dai sauransu.

Dangane da haka ne a jiya aka gudanar da taron tuntuba na wakilai da jami'an kula da haramin kasar Iraki a birnin Najaf, kuma a cikin wannan taron an tattauna hanyoyin samar da ingantacciyar hidima ga masu ziyara a yayin gudanar da tarukan Arbaeen Husaini.

Salim Al-Jasani, memba a majalisar gudanarwa ta hubbaren Alawi, ya ce: "Ana sa ran cewa bayan guguwar corona ta lafa, za mu shaida kasancewar miliyoyin masu ziyara a taron Arbaeen na bana."

Har ila yau, domin yi wa masu ziyara hidima, an aiwatar da shirye-shirye da ayyukan hidima da dama a garuruwa daban-daban na kasar Iraki, wadanda suka hada da kayan aiki, da shiryawa da kuma shimfidu da katifu.

4082793